etablerar.no gir gratis hjelp til gründerar

– Dette gjer Vest-Telemarkrådet for å hjelpe folk som har ein idé med å kome vidare, seier dagleg leiar Anne Aasmundtveit.

Satsar 1,8 mill.

Gjennom tre år skal kommunane i Vest-Telemark og staten gjennom bygdevekstavtalen bruke inntil 1,8 millionar kroner på å hjelpe gründerar med å realisere idéar og slik lage fleire private arbeidsplassar.

Stian Hauge og Eirik Næss i Str8line vann konkurransen då Vest-Telemarkrådet valde kven som skal hjelpe etablerarar fram til og med 2028.

– Det er to årsaker til at Str8line blei vald: Begge rådgjevarane har master i innovasjon og entreprenørskap og har solid erfaring med å starte selskap, seier Aasmundtveit.

Tenesta blei sett ut på anbod for å sikre at alle gründerar i Vest-Telemark får lik kvalitet og service på tilbodet.

Stian og Eirik

Stian Hauge har master i innovasjon og entreprenørskap, bachelor i nanoteknologi, har jobba fem år i Forsvaret og bygd selskap sidan 2010.

Eirik Næss er siviløkonom med innovasjon og entreprenørskap som spesialisering, har jobba mykje i privat næringsliv og har dei siste ti åra starta fleire bedrifter. Han driv i dag seks ulike selskap.

Gründerar hjelper gründerar

– Eg har jobba saman med Stian i fem år og me har vore svært fokuserte på det me held på med. Eg trur me som gründerar har mykje å bidra med til andre gründerar, seier Næss.

– Me har begge bygd stein for stein i ein del selskap. Målet er å lyfte dei som er akkurat litt for dårlege til å bli bra nok og litt til. Dei som er ordentleg gode ynskjer med å lyfte den ekstra mila så dei blir skikkeleg, skikkeleg gode!

Poteter

– Kva konkret tilbyr etablerar.no?

– Me tilbyr eigentleg alt! Her møter du ein person som kan ha gjort det før – eller ikkje gjort det før. Alt frå kor du skal registrere eit selskap til kor du skal finne investor og kapital. I det spennet ligg det mykje. Leveransen er brei, og der er det ein fordel at Eirik og eg har så variert bakgrunn og er poteter som gjer absolutt alt i eit selskap, smiler Hauge.

Sjekklista

etablerar.no har denne sjekklista når dei hjelper deg med idéen din:

Idéavklaring – Me testar om idéen din held vatn før du satsar alt.

Marknadsinnsikt – Kven er kunden din, og vil dei betale?

Finansiering – Oversikt over støtteordningar og hjelp til søknadar.

Nettverk – Introduksjonar til bank, rekneskap og andre gründerar.

Ikkje kroner

etablerar.no seier Me hjelper deg å sortere tankane, teste idéen og finne vegen vidare. Gratis, uforpliktande og lokalt forankra.

– Kva kan de ikkje hjelpe med?

– Me deler ikkje ut pengar, men me kan hjelpe deg å finne ut kor du kan få tak i tilskot om idéen din kvalifiserer til det! Me kan på mange vis hjelpe med alt. Me er pragmatiske i kva me tek tak i, og så er me tydelege på kva me kan og ikkje kan.

Tre råd for å lukkast

1. Idéen må løyse eit reelt problem og ha ein marknad.
2. Du må tole litt juling og vere uthaldande. Du kjem til å tryne mange gonger uansett kva du skal i gang med. Reis deg og prøv att!
3. Finn bransjekunnskap. Då kan du enklare ta ein posisjon i ei verdikjede. Her ser me no store moglegheiter med AI.

Den største fella

– Kva seier de om idéen er skikkeleg dårleg?

– Dersom me trur at nokon kjem til å skade seg sjølv og økonomien sin, så føler eg at me må seie det.

Gründerhjelparane i Kviteseid er svært klar over både slit og klein nattesvevn når ein idé skal realiserast.

Stian: – Eg opplever at det er mange som har store forventingar om at kommunen skal løyse veldig mykje… Men du må ta på deg skoa, ta telefonen og gjere jobben.

Eirik: – Klarer du ikkje å ringje ein ressursperson for å spørje om hjelp, så kjem du ikkje til å klare det. Du må faktisk søke råd og støtte der du kan finne det.

Kva er den største fella å gå i som etablerar?

At du ikkje maktar å justere kursen når du ser at det er behov for det. Lagar du eit produkt ingen vil ha, så må du endre produktet, elles kjem det ikkje til å gå.

Titanic hadde kome fram om skipet hadde svinga litt tidlegare, smiler Eirik Næss.

Teams eller Kviteseidbyen

Har du ein idé og har lyst til å lage din eigen arbeidsplass, kontaktar du Etablerartenesta i Vest-Telemark på etablerar.no ! Du får 6 timar gratis rådgjeving pluss 3 timar ekstra dersom næringssjefen i kommunen din meiner at dette er nyttig for deg.

Dei fleste møta er på Teams eller fysisk på kontoret til etablerar.no i Kviteseidbyen. Sidan starten på nyåret har 6 kvinner og 12 karar frå heile Vest-Telemark nytta seg av tilbodet – men så langt ingen frå Vinje.